31 May 2001 Hon Margaret Wilson Minita nona te Mana Whakarite Take e pa ana ki Te Tiriti o Waitangi He kaupapa hou hei whakaea i nga take e pa ana ki nga roto Kua horaina etahi kaupapa hou e Te Minita mo nga Take Tiriti e Margaret Wilson, raua ko Te Minita Maori a Parekura Horomia, ki mua i te iwi o Te Arawa. Ki te whakaae a Te Arawa, ka tatu nga take katoa e pa ana ki nga roto tekau ma wha i te rohe o Rotorua. v Ki te whakamanaia enei kaupapa, e kore te iwi whanui o Aotearoa e aukatia i nga roto. I raro i enei kaupapa ka whakaae Te Kawanatanga ki nga panga tuku iho o Te Arawa ki nga roto. Ka whakapaha hoki Te Karauna mo tona kore whakapiki i nga moni a-tau ki a Te Arawa mo nga roto nei, i te ngoikoretanga o te wariu o aua moni. I tua atu i tenei, ka whakanohoia te mana o te papa o nga roto ki a Te Arawa. Ka whakatoitutia te whainga mana o Te Arawa i roto i nga mahi whakahaere tikanga mo nga roto katoa, i te taha o etahi atu, i roto i te runanga mo nga roto e korerotia nei. Kei roto i tenei runanga he kanohi no nga ropu katoa e whaipanga ana ki nga roto i raro i te Ture. E mea ana Te Karauna ka noho ko Te Kaunihera a-Rohe o Rotorua ki te whakahaere i nga papa o nga roto, i ia ra, i ia ra. E rua nga roto, Tutaeinanga me Ngapouri, ka whakahaeretia tonutia e te Eastern Fish and Game Council. Kei roto i te kaupapa hou a Margaret Wilson he putea, hei whakaea i nga kereme katoa o nehe o Te Arawa e pa ana ki nga roto. Kua whakapuakina hoki tetahi atu kaupapa e Te Minita Maori, hei hoko rawa mai i te moni a-tau mo ake tonu atu. Ko te rahi o nga moni kaore ano kia panuitia ki te marea, engari ki a Te Arawa anake i tenei wa. He mea tenei kia ngawari ai te whakawhitiwhiti korero mo te kaupapa nei. "Ka nui te mihi ki te manawaroa o Te Arawa ki te noho ngatahi ano ki te whiriwhiri tikanga mo tenei kaupapa, me te nuinga atu hoki o nga ropu iwi whanui puta noa te rohe o Te Waiariki. Na kona i whakahohorotia ai e Te Karauna nga tikanga whakataunga i tenei tau. He kaupapa tenei i waihangatia i runga i te tumanako ka taea nga iwi katoa te whakatutuki ngatahi tetahi whakataunga tuturu, kia ahu whakamua i runga i te whakaaro kotahi,' e ai ki nga Minita.   PREVIOUS | CONTENTS | NEXT

Executive Homepage | Minister's Homepage